Le Roman du Renart - D. M. Méon - 1826

Front matter

La plupart des corrections figurant dans les errata I, II et III, ainsi que celles spécifiées dans les suppléments au chapitre Corrections aux quatre volumes du Renart ont été remplacées dans le texte. Malheureusement il appert que parfois la numérotation des vers est erronée, dans ce cas nous n’avons pu effectuer les corrections souhaitées. | Une note suivant le(s) mot(s) concerné(s) indique ces corrections afin que le lecteur ne croie pas à une faute de notre part.

-

-

1

Seignor, oï avez maint conte Que maint conteres vos aconte, Coment Paris ravi Helayne, Les max qu’il en ot et la paine, De Tristram qui la chievre fist, Qui assez belement en dist Et fables et chançons de gestes : Romanz du leu et de la beste Maint autre conte par la terre ; Mais onques n’oïstes la guerre Qui tant fu dure de grant fin Entre Renart et Ysengrin, Qui moult dura et moult fu dure. Des deus barons ce est la pure, Onques ne s’entr’amerent jor, Mainte mellée et maint estor

Ot entr’aus deus, ce est la voire : Dès or comencerai l’estoire Et de la noise et del content. Or orrez conmencement Par qoi et par quel mesestance Fu entre eus deus la deffiance. Or oez, si ne vos anuit, Je vos conteré par déduit Conment il vindrent en avant, Si con je l’ai trové lisant, Qui fu Renart et Ysengrin. Je trovai jà en un escrin Un livre, Aucupre avoit à non : Là trovai-je mainte reson Et de Renart et d’autre chose Dont l’en doit bien parler et ose. A une grant letre vermoille Là trovai-je mainte mervoille ; Se je ne la trovasse el livre, Je tenisse celui por yvre Qui dite éust tele aventure ; Mès l’en doit croire l’escripture. A desenor muert à bon droit Qui n’aime livre ne ne croit. Aucupre dist en cele letre (Bien ait de Diex qui li fist metre !) Come Diex ot de paradis Et Adam et Evain fors mis

Por ce qu’il orent trespassé Ce qu’il lor avoit conmandé. Pitiez l’emprist, si lor dona Une verge, si lor mostra Qant il de riens mestier auroient, De cete verge en mer ferroient. Adam tint la verge en sa main, En mer feri devant Evain : Sitost con en la mer feri, Une brebiz fors en sailli. Lors dist Adam, dame, prenez Ceste brebiz, si la gardez ; Tant nos donra let et fromage, Assez i aurons compenage. Evain en son cuer porpensoit Que s’ele encor une en avoit, Plus belle estroit la conpaignie. Ele a la verge tost saisie, En la mer feri roidement : Un Leus en saut, la brebiz prent, Grant aléure et granz galos S’en va li Leus fuiant au bos. Qant Eve vit qu’ele a perdue Sa brebiz, s’ele n’a aïue, Bret et crie forment, ha ! ha ! Adam la verge reprise a, En la mer fiert par mautalent, Un chien en saut hastivement.

Quant vit le Leu, si lesse corre Por la brebiz qu’il velt rescorre. Il li resquest : moult à enviz L’a laissé li Leus la brebiz ; Si feroit-il encor demain S’il la tenoit n’à bois n’à plain. Por ce que mesfet ot li Leus, Au bois s’en foui tot honteus. Quant Adam ot son chien et sa beste, Si en ot grant joie et grant feste. Selonc la sentence del livre Ces deus bestes ne puent vivre Ne durer mie longement, S’eles n’estoient avec gent. Ne savez beste porpenser Miex ne s’en puisse consiévrer. Toutes les foiz c’Adam feri En la mer, que beste en issi, Cele beste si retenoient, Quele que fust, et aprivoient. Celes que Eve en fist issir, Ne pot-il onques retenir ; Sitost con de la mer issoient, Après le Leu au bois aloient. Les Evain asauvagisoient, Et les Adam aprivoisoient. Entre les autres en issi Le Gorpil, si asauvagi :

Rous ot le poil conme Renart, Moult par fu cointes et gaingnart : Par son sens toutes decevoit Les bestes qanqu’il en trovoit. Icil Gorpil nos senefie Renart qui tant sot de mestrie : Tot cil qui sont d’engin et d’art Sont mès tuit apelé Renart. Por Renart et por le Gorpil Moult par sorent et cil et cil. Se Renart set gens conchier ; Le Gorpil bestes engingnier. Moult par furent bien d’un lignage Et d’unes meurs et d’un corage. Tot ensement de l’autre part Ysengrin li oncles Renart, Fu, ce sachiez, moult fort roberre, Et par nuit et par jour fort lerre. Icelui Leu senefia, Qui les berbiz Adam roba, Tot cil qui sorent bien rober, Et par nuit et par jor embler, Sont bien à droit dit Ysengrin. Cist furent bien endui d’un lin, Et d’un pansé et d’un corage, Larron furent tuit d’un aage. Et Ysengrin apele-l’on Le Leu par iceste acoison.

Dame Hersent resenefie La Louve qui si est haïe, Que si par est aigre d’anbler, Bien puet cele Hersent senbler. Cele Hersent la lentilleuse, Qui fame ert Ysengrin espeuse, La Gorpille le senefie, Car moult set d’art et de murtrie ; Se l’une iert mestre abaeresse, Et l’autre mestre lecharesse, Moult furent bien les deux d’un cuer, L’une fu l’autre. suer Por Richout la fame Renart Por le grant engin et por l’art Est la Gorpille Richeut dite, Se l’une est chate, l’autre est mite. Moult a ci bone conpaignie, Et l’une et l’autre senefie. Cist quatre furent bien asanblé, Cinz ne furent mès tel trové. Se Ysengrin est mestre lerre, Ausi est li rous forz roberre : Si Richeuz est abaiaresse, La Gorpille est fort lecharesse. Por ce qu’erent si d’un traïn, Estoit Renart niés Ysengrin ;

Por ce que si bien s’entr’amoient Et qu’ansanble sovent aloient, Li Leus dou Gorpil fait neveu, Et li Gorpiz oncles dou Leu. Si faitement con je vos di, Sont entre eus parent et ami ; Ne s’apartienent autrement Se mes bons livres ne me ment, Por ce que le Gorpil disoit, Qant il avec le Leu aloit, Biaus oncles, que volez-vos fere ? Le voloit à s’amor atrere. Li Leus disoit par amor fine Au Gorpil vers qui n’ot haïne, Par amitié s’entr’apeloient Oncle et neveu qant se véoient. A Renart puet-l’en bien aprendre Grant sens qui bien i velt entendre : Car cil Renart nos senefie Ceus qui sont plain de felonie, Qui ne finent del agaitier Con puissent autrui engingnier ; Ne jà le fel liez ne sera Le jor q’autrui n’engingnera. Al engingnier li sont onni Privé, ou estrange ou ami : Jà un sol n’en espargnera, Jà si chier ami ne sera,

Et avec cele felonie A-il le cuer tot plain d’envie, Et envie est tele racine Où touz li max prenent orine. Avec felonie et envie Escharsetez est lor amie, Et escharsetez est tel chose Que toz tens a la borse close. Escharsetez est une vice Qui forment aime avarice : Avarice a le mont sorpris, Cil est clamez dolent, chaitis, Ne rente n’a, se il n’usure. Or ai parlé outre mesure, Que cil qui les granz rentes ont, Ce sont cil qui grant mal en font ; Moult en puet-l’en vilment parler, Mès je n’ai soing de plus conter. Une riens vos voil acointier, Ne vos devez esmerveillier Se j’ai mis en cest mien traitié Que de Renart ai commencié, Si con l’en parole d’autrui, Con vos porroiz oïr encui De dant Renart et d’Ysengrin, Car ce content nostre voisin Que une anesse parla jà Que un prophete chevaucha ;

Balaam l’oï apeler, Por ce le sai ici nomer. Bellaac un roi l’ot mené, Tant li ont pramis et doné Par mautalent et par grant ire, Tout le pueple Israel maudire. Nostre sire nel’volt soufrir, Son ange fist devant venir, A une bien tranchant espée La voie a à celui véée. Cil point l’asne del aguillon Par derrière sor le crespon, Des esperons le destraingnoit, Et du chevestre le feroit. L’asne n’osoit avant aler, Par force le covint parler, Et Diex le volt qu’ele parla, Et le Profête raconta : Diva ! fait-il, lesse m’ester, Diex ne me lesse avant aler. Cil Diex si li vient à plaisir, Puet encore bien consentir A parler les bestes sauvages, Et les usuriers fere larges. Or avez bien oï atant Conment il sont venu avant Renart et Ysengrin li Leus, Or redevez oïr des deus,

Si vos conteré de lor vie Ce que j’en sai une partie. Toz malades plain de raoncle Vint Renart un jor à son oncle : Dist Ysengrin, biaus niés, q’as-tu ? Moult te voi ore confondu. Ce dist Renart, malades sui. Voire, biau niez, menjas-tu hui ? Nenil, sire, ne n’ai talent. Levez-vos sus, dame Hersent, Fetes li un petit de haste De deus roignons et d’une rate. Renart se séoit toz enbrons, Pensoit qu’il éust fet bacons : Un petitet leva la teste, Troi bacons vit pendre à la feste ; En sorriant as bacons dist, Moult par est fox qui là vos mist. Haï ! biax oncles Ysengrin, Jà sont-il tant malvez voisin, Tiex puet là voz bacons véoir Qui en voudra sa part avoir. Isnelement les despendez, Dites qu’en les vos a emblez, Dist Ysengrin, n’en goustera Tiex, con je cuit, qui les verra, Dont conmença Renart à rire. Nel’porrez, dist-il, escondire,

Tiex hons vos en porroit rover. Dist Ysengrin, lessiez ester, Je n’ai frere, neveu ne niece A qui j’en donasse une piece ; Por lui le dist et por son pere, Et por sa fame et por sa mere. Ne demora mie granment Que Renart vint tot coiement En sa Meson qant il dormi, Tout coiement la descovri Par tel vertu i seut ses cors, Les trois bacons en sacha fors ; En sa meson les enporta, Et par pieces les despeça, En son lit les mist en l’estrain. Ysengrin est levez par main, Il vit sa meson descoverte Et de ses troi bacons la perte : Ahi ! dist-il, dame Hersent, Conchié somes laidement. Ele saut sus conme desvée Toute nue et eschevelée ; Diex ! dist-ele, qui a ce fait ? Ci a estout, domage et lait. Ne le sevent sor qui souchier, N’a entre eus deus que corocier. Conme ce vint après mengier, Renart s’en vint esbanoier

En la meson moult liéement, Son oncle trove moult dolent. Oncles, dist-il, que avez-vos ? Pensis vos voi et corouços. Biaus niez, dist-il, bien sai de qoi, Perdu sont mi bacon tuit troi, S’en ai au cuer dolor et ire. Oncle, dist-il, or devez dire, Se vos dites aval la rue, Que cele char aiez perdue, Puis ne vos en rovera mie Parent, ne ami, ne amie. Biax niez, fet-il, por voir te di, Perdu les ai, ce poise mi. Renart respont, ainz n’oï tal, Tiez se plaint n’a mie de mal : Bien sai qu’en sauf les avez mis Por voz parenz, por voz amis. Diva ! fet-il, es-tu gabere, Foi que tu doi l’ame ton pere, Et ne croiz-tu ce que je di ? Toz tens dites, dist Renart, si. Renart, or dist dame Hersens, Je cuit vos estes fors du sens ; Se nos nes éussions perduz, Jà escondit n’en fust renduz. Dame, dist-il, je le sai bien Que moult savez d’art et d’engien ;

Nequedent tant i a de perte, Vo meson avez descoverte, Or dites par là en sont tret. Par Dieu, Renart, si sont-il fet. Renart respont, ce devez dire. Renart, n’en ai talent de rire ; Ce poise moi qu’il sont perdu, Grant domage i avon éu. Atant s’en va Renart joianz, Et cil remestrent tuit dolenz : Ce fu des enfances Renart. Tant aprist puis d’engin et d’art, Que il en fist puis maint anui Et à son oncle et à autrui. Cil plet fu atant definez, Et Renart s’est acheminez, Et s’en vet par le bois fendant ; Par une roche en un pendant S’en vet Renart les saus menuz, Ses amis a bien confonduz, Car bien est des bacons delivre. Fuiant s’en vet tot à delivre, Onc ne fina et tant s’esgaie, Qu’il s’enbati en une haie Par desus une fosse oscure. Là il avint une aventure De qoi il li anuie et poise, Qar par ce conmença la noise

Par mal pechié et par déable Vers Ysengrin le conestable. Qant il vit la cavée roche, Ne set que est, avant s’aproche Et por enquerre et por savoir Où il péust repos avoir. Ainz n’en sot mot que il s’avale, Qu’il se trova enmi la sale Dant Ysengrin son bon ami. Quatre Loviax gisent enmi Et ma dame Hersent la Love Qui ses loviax norrist et cove. Novelement est acouchie, A chascun donoit sa bouchie, Mès n’avoit pas son chief covert. Garda, si vit l’uis entr’overt, Et la clarté qui trop li griéve ; Por regarder sa tête liéve Por savoir qui là ert venuz. Renart fu grelles et menuz, Muciez estoit derier la porte : Mès Hersent qui moult s’en conforte, Le conut bien à la pel rouse, Ne pot muer que ne s’escouse, Si li a dit tout en riant, Renart, qu’alez vos espiant ?

Qant Renart sot qu’il ert véuz Et qu’il estoit aparcéuz, Adont fu-il toz desconfiz, De honte avoir est-il toz fiz ; N’ose mot dire tant se doute, Que laienz ne véoit-l’en goute. Hersent saut sus, lieve son chief, Si le rapele de rechief, Et acene à son grelle doit, Renart, renart, ce que ce doit, Que soiez fel et deputaire, Onc ne me vosistes bien faire, Ne ne venistes là où g’iere, Je ne sai riens de tel conpere Qui sa conmere ne revide. Renart a grant péor et hide, Ne puet muer ne li responde. Dame, fet-il, Dex me confonde, S’onques por mal ne por haïne Ai eschivé vostre gesine, Ainz i venisse volentiers ; Mès qant je voi par ces sentiers, Si m’espie dant Ysengrins Et par voies et par chemins, Por ce si ne sai que je face, Tant con vostre sires me hace :

Moult fet grant pechié qui me het, Mès li miens cors ait mal dahet S’onques li fis chose nis une Dont me déust porter rancune : Por ce n’os vers vos reperier, Si m’en puis moult forment irier. Je vos ains, dist-il, par amors, Si en a fait maintes clamors Par ceste terre à ses amis, Et si lor a avoir pramis Por moi fere laidure et honte. Mès dites moi, à moi que monte De vos requerre tel folie ? Certes je nel’feroie mie, Ne tel parole n’est pas bele. Qant Hersent entent la novele, De mautalent tressue et art : Conment, fet-el, sire Renart, En est dont parole tenue ? Cestes mar i fui mescréue. Tel cuide sa honte vengier Qui porchace son enconbrier. Ne m’est or pas honte nel’die, Ainz mès ne pensai vilanie ; Mès por ce qu’il s’en est clamez, Voil-ge certes que vos m’amez, Si revenez sovent à mi, Et je vos tendrai por ami.

Acolez moi, si me besiez, Or en estes bien éésiez, Ci n’a qui encuser nos doie, Renart en demaine grant joie Et vient avant, si l’a besie. Hersent a la cuisse haucie A qui moult plesoit cel ator. Puis s’est mis Renart el retor Qui n’a cure de cel bargaigne, Qu’il crient que Ysengrin ne viengne ; Mès neporqant ainz qu’il s’en isse Vient as loviaus, si les conpisse Si con il ierent arengié : Si a tout pris et tot mengié, Et fors gité ce qu’il i trueve, Tote la viez char et la nueve, S’es a de lor liz abatuz Et laidengiez et bien batuz Autresi con s’il fust lor mestres, S’es a clamez avostre et questres Privéement conme celui Qui ne se doute de nului, Fors que dame Hersent s’amie Qui ne l’en descoverra mie. Les Loviax a lessiez plorant, Dame Hersent lor vint devant, Si les a blandiz et proiez : Enfanz, dist-ele, ne soiez

En vostre cuer si fel ne sot Que vostre pere en sache mot, Ne jà ne li soit connéu Q’aiez céenz Renart véu. Qoi, déable ! nos celerons Renart le rous que tant haons De mort, qu’avez ci recéu, Et nostre pere decéu Qui en vos avait sa fiance ! Jà, se Dieu plest, tele viltance Dont nos somes si laidengié Ne remaindra ne soit vengié. Renart les oï gorgocier Et vers lor mere corecier, Si s’est tantost mis à la voie Le col bessié que nus nel’voie, Si va porchacier son afere. A tant este-vos que repere Dant Ysengrin à sa mesnie Qui soz la roche est entesnie. Tant a coru et porchacié, Et tant porquis et tant tracié, Que toz est chargiez de vitaille. D’autrui domage ne li chaille, Si a trovée sa mesniée Que Renart ot estoutoiée. Si fil se sont à lui clamé Que batuz sont et afamé,

Et compissiez et traïnez Et laidengiez et puis clamez Fil à putain, bastart, avoutre, Et encore dist-il tot outre Certes que vos estiez cous. Lors s’est Ysangrin d’ire estous Qant de sa fame oï le blasme ; A bien petit qu’il ne se pasme, Il ulle et bret come desvez. Hersent, or sui-je malmenez ; Pute orde vis, pute mauvese, Je vos ai norrie à grant aise Et bien gardée et bien péue, Et un autre vos a croissue. Moult est tes corages muanz Qant Renart cil rous, cil puanz, Cil viz lechierres, cil garçons Vos monta onques es arçons. Par les iaus Dieu mar i fui cous, Honi m’avez tout à estrous ; Jamès ne gerrez à ma coste Qant recéu avez tel oste, Se ne faites tot mon voloir. Jà se péust Hersent doloir Se ne l’éust acréanté Tot son bon et sa volenté. Sire, fait-ele, vos diroiz Corociez estes, n’est pas droiz

Que vos mostrez ici vostre ire, Que s’om me laissoit esconduire Par sairement et par joïse, Jel’feroie par tel devise C’om me féist ardoir ou pendre Se ne m’en poïsse desfendre. Si vos afi ensorquetot Que mon pooir ferai de tot De ce que vodrez conmander. Cil ne set plus que demender, Il ot que ele dist assez, Ses mautalenz est trespassez, Mès que il li ait fait jurer Que jamès ne lera durer Renart se le puet ainz véoir : Or se gart, qu’il fera savoir. Isangrin fu bauz et haitiez, Et dist, or iert Renart gaitiez Sovent ainz que la guerre esparde, Que fous sera s’il ne se garde. De lui gaitier sont en grant paine, Mès ainz que passast la semaine Lor vint une avanture estrange. Ensi conme la voie change, Lez un essart delez un clous Ileuc dut Renart estre enclous, Où avoit jà les pois soiez, Et li pesaz estoit loiez

Et amassez et trait en voie. Là savoit bien Renart la voie, Venus i estoit por furgier Et por enquerre et por cerchier Où il poïst avoir viande. Ysengrin qui el ne demande Mès que il tenir le péust, Baisse la teste, sel’conust ; Gita un bruit, si escria. Renart qui point ne s’afia, L’a bien oï et entendu, Si s’enfuist à col estendu. Après se metent où chemin Entre Hersent et Ysengrin. Il se painent de lui chacier, Mès ne se puent avancier. Renart corut la voie estroite, Et Ysengrin cort la plus droite : Hersent a enforcié son poindre Qui à Renart se vodra goindre, Vit Ysengrin qui a failli, Que Renart d’autre part sailli, Après Renart s’est avanciez. Renart le vit si adreciez, Ne s’ose à lui abandonner, Ainz ne fina d’esperoner Jusqu’a l’entrée d’un val crués. Qant il i vint, s’i entra lués,

Qant vit Dame Hersent s’amie Qui vers lui vint si enbramie, Et de lui n’a-il mie garde ; Là fist Hersent que trop musarde. Après Renart en la fosse entre De plain eslais de ci au ventre, Li chastiaus estoit auques fort, Et Hersent par si grant effort Se feri dedenz la taisniere Que ne se pot retraire arriere. Qant Renart vit que ele est prise, Ne volt laissier à nule guise Que il ne voille à lui gesir, Et faire de lui son plaisir. Par un poi que Hersent ne crieve, Que la fouse et Renart li grieve. La fosse de desus l’estraint, Et Renart qui dedenz l’enpaint. Il n’est ileuc qui la resqeue, Mès que seulement de sa qeue Que ele estraint si vers les rains Que des deus pertuis daarains N’en per un defors ne dedenz. Et Renart prist la qeue as denz Et li reverse sor la crope, Et les deus pertuis li estope, Puis li saut sus liez et joianz, Si li fait tot ses iauz véanz,

Ou bien li poist, ou il li plaise, Tout à laisir et à grant aise. Ele dist que qu’il la croissoit, Renart, c’est force, et force soit. Sire Renart tel li redone Que toute la fosse en estone. Ainz que la chose soit fenie, Li dist Renart par felonie, Dame Hersent, vos disiez Que jà ne m’en prieriez, Et que jamès nel’vos feroie Par seul itant que m’en ventoie. Jà voir ne m’en escondirai, Se jel’fis, encor le ferai ; Fis et ferai, dis et redis Plus de sept foiz, voire de dis, Et l’afaire ont recommencie Ainz qu’il éussent partancie. Ez-vos poignant parmi les broces Ysengrin qui s’enbat as noces : Ne se pot mie tant tenir Que il poïst à aus venir, Ainz s’escria moult hautement, Ahi ! Renart, or belement, Par les Sainz Dieu mar l’asausites. Renart fu remuenz et vites, Si li a dit tot en alant, Sire Ysengrin, cest mautalant

Ai-ge conquis par biau servise, Véez con Hersent est ci prise ; Se je l’aïde à desserrer Et dou pertuis à destouper, Por ce si estes esfraez. Por Dieu, biau sire, nel’créez Que nule riens i aie faites, Ne dras levez ne braies traites, Ains par cest cors ne par ceste ame Ne forfis riens à vostre fame, Et por moi et por lui desfandre Tot par là où le vodrez prendre, Un sairement vos aramis Au los de voz meillors amis. Sairement ! traïtres provez, Voir por noient l’escondirez N’i controverez jà mançonge, Ne vaine parole, ne songe, N’i convient nule coverture, Tote est aperte l’aventure. Avoi, ce dist Renart, biau sire, Vos porriez assez miaux dire : Ice maintenir ne devez. Comment ai-ge les iauz crevez ? Quidiez que je ne voie goute ? En quel lieu enpaint-l’en et boute Chose que l’en veut à soi traire Come je vos vi Hersent faire ?

Par Dieu, sire, ce dist Renart, Vos savez bien engin et art ; Si vaut à la chose bornir, C’on ne puet par force fornir. Ma Dame est prise en cele fouse Qui moult est voir espese et grouse ; En nul sens traire ne l’en puis A reculons par cest pertuis. Ele i est jusqu’au ventre entrée, Et la fosse a petite entrée, Mès elle est de lonc auques graindre, Por ce la voloie enz enpaindre. Por noient à moi la sachasse, Que j’oi l’autrier la jambe qasse. Or en avez oï la voire, Si m’en devez à itant croire, Se vos controver ne volez Achoison si com vos solez. Et qant la Dame ert de ci traite, Je ne cuit clamors en soit faite, Ne jà, s’ele ne velt mentir, Ne l’en orrez un mot tentir. A icest mot s’est entesniez Qant assez se fu deresniez. Ysengrin fu de l’autre part, Si voit Renart qui prent et part,

Qui l’a honi ses eulz voiant, Puis si le gabe et va moqant, Mès il n’a or soing de plaidier, Ainz se redresce por aidier Sa fame qui va male voue ; Si l’a saisie par la quoue, De tel vertu à soi la tire Que Hersent est en tel martire, Que il li covint par angoisse Que le pertuis derriere croisse. Ysengrin voit qu’elle se vuide, Or l’aura-il si con il cuide. Un petitet s’est tret arriere, Il voit qu’ele est en la chariere, Si s’est un petit alaschie. Hersent ne pot estre sachie ; S’il ne la tret, il est dolenz. Il n’est pas pereceus ne lenz, As ongles s’est pris et si grate, Tret la terre fors à la pate ; Grate de là, et puis deça, Déables l’auront s’il ne l’a. Qant il en a assez osté Et sus et jus et au costé, Vint à Hersent, si la soufache, Et qant il la trove un peu lasche, Empaint et tire et sache et boute, A poi la qeue ne ront toute,

Mès ele estoit bien atachie. Tant l’a empainte et fors sachie, Que merci Dieu bien s’est tenue Tant que Hersent est fors issue. Traite l’en a à moult grant peine, A poi que ne li faut l’alaine. Il voit Renart qui poi le doute, Car il s’est mis dedenz sa croute. Quant Ysengrin la vit delivre, Haï ! fet-il, pute orde vivre, Pute serpent, pute coleuvre, Bien ai véue toute l’uevre ; Bien me set Renart acupir, Je le vis sor voz rains gésir, Ne vos en povez escondire. Par poi Hersent n’enrage d’ire Por Ysengrin qui si la chose ; Mès nequedent toute la chose De chief en autre li raconte, Sire, il est voir qu’il m’a fet honte, Mès n’i ai mie tant meffet Endroit ce que force m’a fet : Lessiez ester tot cest contrere, Ce qui est fet n’est mie à fere. C’est outré, à el entendez, Jà cest meffet n’ert amendez Par chose que nos en dion. A la Cort Noble le Lion

Tient-on les plès et les oiances De mortiez guerres et de tences, Là nos irons de lui clamer, Bientost le porrez amender, Se ce puet estre à Cort porté. Cest mot a tot reconforté Dant Ysengrin le corrocié. Certes, fet-il, ai trop groucié, Moult iere fox et poi savoie, Mès cest conseus m’a mis à voie : Mar vit Renart son grant desroi Sel’puis tenir à Cort de Roi.

2

Seignor, ce fu en cel termine Que li doz tens d’esté define Et yver revient en saison, Que Renart fu en sa maison. Sa garison a despendue, Ce fu mortel desconvenue : N’ot que doner ne que despendre, Ne ses detes ne pooit rendre ; N’a que vendre ne qu’acheter, Ne s’a de coi reconforter. Par besoing s’est mis à la voie, Tot coiement que nus nel’voie S’en vet parmi une jonchiere Entre le bois et la riviere. A tant fet et tant a erré, Qu’il entre en un chemin ferré : El chemin se croupi Renarz, Si coloie de toutes parz ; Ne set sa garison où querre, Et la fain li fet sovent guerre, Ne set que fere, si s’esmaie. Lors s’est couchiez lez une haie,

Ilec atendra aventure. Atant ez-vos grant aléure Marchéanz qui poisson menoient, Et qui de vers la mer venoient. Harenz frès orent à plenté, Que bise avoit auques venté Trestoute la semaine entiere ; Et bons poissons d’autre maniere Orent assez granz et petiz Dont lor paniers furent garniz. Que de lamproies et d’anguilles Qu’il orent acheté as villes Bien fu chargie la charrete. Et Renart qui le siecle abete, Fu bien loing d’eus près d’une archie, Qant vit la charrete chargie Et d’anguilles et de lamproies. Fichant musant parmi ces voies Cort au devant por els deçoivre, Ainz ne s’en porent aparçoivre. Lors s’est couchiez enmi la voie : Or oez conment les desvoie. En un gason s’est ventrilliez, Et conme mort apareilliez Renart qui tot le monde engingne, Les eulz clot et les denz rechingne, Si tenoit s’alaine en prison. Oïstes mès tel traïson !

Illeques est remès gesanz. Atant es-vos les marchéanz, De ce ne se prenoient garde. Le premier le vit, si l’esgarde, Si apela son compaignon, Vez là ou Gorpil ou Tesson. Li uns le voit, si s’escria, C’est un Gorpil, va, sel’pren, va, Filz à putain, gart ne t’eschat. Or saura-il trop de barat Renart s’il ne lesse l’escorce. Li marchéant d’aler s’esforce, Et ses conpains venoit après. Qant il furent de Renart près, Le Gorpil trovent enversé, De toutes parz l’ont reversé, Pincent le col et puis la coste, Il n’ont pas péor de tel oste. Li uns a dit, quatre sols vaut, Li autre a dit, assez plus vaut, Ainz valt cinc sols à bon marchié. Ne somes mie trop chargié, Jetons le en nostre charete ; Vez con la gorge a blanche et nete. A cest mot se sont avancié, En la charete l’ont chargié, Et puis se sont mis à la voie. Li uns à l’autre en fait grant joie

Et dient jà n’en feront el, Mès enquenuit à lor ostel Li reverseront la gonele. Or ont-il auques la favele, Mès Renart n’en fet que sourire, Que moult a entre fere et dire. Sor les paniers se gist adenz Si en a un overt as denz, Et si en a, bien le sachiez, Plus de trente harenz sachiez. Auques fu vuidiez li paniers, Qu’il en menja moult volentiers. Onques n’i quist ne sel ne sauge, Encor ançois que il s’en auge Getera-il son ameçon, Il n’en ert mie en soupeçon. L’autre panier a asailli, Son groig i mist, n’a pas failli Qu’il n’en traisist fors des anguiles. Renart qui sot de tantes guiles, Troi hardiaus mist entor son col, De ce ne fist-il pas que fol. Son col et sa teste passe outre, Les hardeillons moult bien acoutre Desor son dos que bien s’en cuevre : Dès or puet-il bien lessier ueve. Or li estuet enging porquerre Conment il vendra jus à terre ;

N’i trove planche ne degré. Agenoilliez s’est tot de gré Por esgarder à son plaisir Conment il puisse jus saillir : Lors s’est un petit avanciez, Des piez devant s’estoit lanciez De la charete enmi la voie, Entor son col porte sa proie. Après qant il ot fet son saut, As marchéanz dist, Diex vos saut ; Cil hardel d’anguilles sont nostre, Et li remanant si est vostre. Et qant li marchéant l’oïrent, A merveilles s’en esbaïrent, Si escrient, vez le Gorpil. Cil saillirent au charretil Où il cuiderent Renart prendre, Mès il ne volt pas tant atendre. Li premier dist, qant ce regarde, Si m’aïst Diex, mauvese garde En avomes pris, ce me semble. Tuit fierent lor paumes ensemble, Las ! dist li uns, con grant domage Avons éu par nostre outrage ! Moult estion fol et musart Trestuit qui créion Renart. Les paniers a bien soufaichiez, Si les a auques alegiez,